| అజిత్‌ డోవల్‌ ఇండియా జేమ్స్‌బాండ్‌ Updated :04-10-2015 03:07:00 |  |
న్యూఢిల్లీ, ఆంధ్రజ్యోతి : దేశ సరిహద్దులు దాటి ఉగ్రవాదులను మట్టుబెట్టే దూకుడు భారత సైన్యానికి ఎలా వచ్చింది? పాక్‌-భారత్‌ సరిహద్దుల్లో పరిస్థితి ఒక్కసారిగా మారిపోవడానికి కారణమేమిటి? దీనికంతటికీ సూత్రధారి ఒకే ఒక్క వ్యక్తి. అతనే ఇండియన్‌ జేమ్స్‌ బాండ్‌ అజిత్‌ కుమార్‌ డోవల్‌. భారత జాతీయ భద్రత సలహాదారు (ఎన్‌ఎస్‌ఏ). డోవల్‌ పేరు భారత్‌కన్నా పాక్‌లోనే సుపరిచితం! ఎన్‌ఎస్‌ఏగా ఆయన ఎంపికైనప్పుడు ‘పాక్‌ను విచ్ఛిన్నం చేయడానికి నియమితుడైన భారతీయుడు’ అంటూ అక్కడి పత్రికలు పతాక శీర్షికల్లో ప్రచురించాయి. డోవల్‌ బాధ్యతలు స్వీకరించిన తర్వాత భారత్‌కు మోస్ట్‌వాంటెడ్‌ అయిన దావూద్‌ ఇబ్రహీం పాక్‌నుంచి ఆఫ్ఘన్‌కు మకాం మార్చాడని సమాచారం. వాజ్‌పేయి ప్రధానిగా ఉన్నప్పుడు ఐబీ డైరెక్టర్‌గా పనిచేసిన డోవల్‌ అపర చాణక్యుడిగా పేరొందారు. ఉత్తరాఖండ్‌లో 1945లో జన్మించిన ఆయన, 1968లో కేరళ కేడర్‌కింద ఐసీఎస్‌కు ఎంపికయ్యారు.
రహస్య గూఢచారి సినిమా చూస్తే కలిగే అనుభూతి డోవల్‌ గురించి తెలుసుకున్నా కలుగుతుంది. పంజాబ్‌, మిజోరం, కశ్మీర్‌లలో గూఢచారిగా ఉగ్రవాదుల నుంచి అనేకసార్లు దేశాన్ని రక్షించిన ఘనత ఆయన సొంతం. వాజ్‌పేయి హయాంలో 1999లో తాలిబన్‌లు భారత విమానాన్ని హైజాక్‌ చేసి కాందహార్‌కు తరలించినపుడు ప్రయాణికులను రక్షించడంలో డోవల్‌ కీలకపాత్ర పోషించారు. మిజోరంలో 1980లో ప్రత్యేక దేశం కోసం పోరాడిన మిజో నేషనల్‌ ఫ్రంట్‌ అధినేత లాల్‌డెంగా అనుచరులను లొంగదీసుకొని వారిచేతే తిరుగుబాటు చేయించి ప్రభుత్వంతో చర్చలకు ఒప్పించిన ఘనతా డోవల్‌దే. అంతేకాదు...1989, 92లలో అమృత్‌సర్‌లోని స్వర్ణదేవాలయంలో బ్లూస్టార్‌, బ్లాక్‌ థండర్‌ ఆపరేషన్ల విజయంలోనూ ఆయన పాత్ర కీలకం. ఆలయంలోని ఖలిస్థాన్‌ తీవ్రవాదుల్లో కలిసిపోయేందుకు డోవల్‌ రిక్షావాలా అవతారమెత్తారు. పాక్‌ గూఢచార సంస్థ ఐఎ్‌సఐ ఏజెంటునని నమ్మించి వారిలో కలిసిపోయారు. తీవ్రవాదులు ఎక్కడెక్కడ ఉన్నా రు? ఎలా దాడులు చేయాలి? అన్న సమాచారాన్ని పంపి స్వర్ణాలయం ఎక్కువ ధ్వంసంకాకుండా ఆపరేషన్‌ పూర్తి చేయించిన ఘనుడు. పాక్‌ ఆక్రమిత కశ్మీర్‌లో 1990లో పాక్‌ ప్రేరేపిత తీవ్రవాదుల శిబిరాల్లోకి చొచ్చుకెళ్లి తిరుగుబాటు తేవడంలోనూ కీలకపాత్ర పోషించారు. కశ్మీర్‌లో 1996 ఎన్నికలకు సానుకూల వాతావరణం సృష్టించడంలో డోవల్‌ కృషి ఎంతో ఉంది. పాక్‌లోనూ ఏడేళ్లు అండర్‌ కవర్‌ గూఢచారిగా ఆయన పనిచేశారు. ఆ సమయంలో ఒకసారి ఆయనకు చిత్రమైన అనుభవం ఎదురైంది. ముస్లిం యువకుని గెట్‌పలో మసీదు వద్ద ఉన్న ఆయన్ను ఒక ముస్లిం మతపెద్ద పిలిచి.. ‘నువ్వు హిందువువా?’ అని అడిగారు. కాదని డోవల్‌ జవాబివ్వగా ఆ మతపెద్ద ఒక చిన్న గదిలోకి తీసుకెళ్లి ‘నువ్వు కచ్చితంగా హిందువువే’నని డోవల్‌ చెవి తమ్మెకున్న రంధ్రాన్ని చూపాడు. ‘హిందువులు మాత్రమే చెవిపోగులు కుట్టించుకుంటారు. నువ్వు హిందువేననడానికి ఈ ఆధారం చాలు. నిజంచెప్పు’ అని గద్దించాడు. దీంతో పుట్టుకతో హిందువే అయినా ముస్లింగా మారానని డోవల్‌ అబద్ధమాడారు. ఇంతకూ డోవల్‌ను నిలదీసిన పెద్దమనిషీ హిందువే. తన బంధువులను ముస్లింలు చంపేశారని అందుకే మారువేషంతో ఉన్నానంటూ... తక్షణం చెవికి ప్లాస్టిక్‌ సర్జరీ చేయించుకోమని సలహా ఇచ్చాడట.
|
No comments:
Post a Comment